Македонски Телеком продолжува да придонесува кон развој на дигитално инклузивно и поврзано општество преку иницијативи насочени кон образованието, дигиталната писменост, поддршката на ранливи категории и развојот на локалните заедници.

Во текот на 2025 година, реализиравме повеќе иницијативи што ја потврдуваат нашата улога како доверлив партнер во дигиталната трансформација на општеството. Во соработка со Министерството за дигитална трансформација, креиравме AI-асистент за полесно пребарување на податоците на националниот портал data.gov.mk. Решението, базирано на OpenAI GPT технологија, овозможува побрз и поедноставен пристап до информации и придонесува кон поголема транспарентност, дигитална вклученост и поефикасни јавни услуги.

Продолживме да инвестираме и во дигитални решенија со директно општествено влијание. Во рудникот „Саса“ имплементиравме современ систем за рано предупредување, којшто овозможува навремено известување при потенцијални опасности и придонесува за заштита на луѓето, заедницата и животната средина.

Преку Фондацијата Телеком за Македонија, продолживме да ги поддржуваме иницијативите за медиумска писменост, безбедност на интернет и дигитална едукација. Преку движењето „Нет без хејт“, реализирано со УНИЦЕФ, продолживме да ги едуцираме младите за одговорно онлајн однесување и создавање побезбедна дигитална средина. Поддршката за платформата EDUINO овозможи дополнителни дигитални едукативни содржини за ученици, наставници и родители, а услугата „Итно копче“ продолжи да обезбедува поддршка и поголема сигурност за повозрасните граѓани.

Во 2025 година, посебен фокус ставивме и на поддршката на ранливите категории и поттикнувањето на солидарноста во заедницата. По повод 8 Март, ја започнавме иницијативата за поддршка на жените жртви на семејно насилство, преку која вработените, корисниците и граѓаните можеа да донираат средства за Кризниот центар „Надеж“ преку TelekomMK апликацијата, платформата Оп-оп и донациски телефонски број. Преку Magenta Moments, собраните срца беа претворени во финансиска поддршка за жените на кои им е најпотребна помош, а иницијативата придонесе и кон подигнување на јавната свест за семејното насилство и колективната одговорност во борбата против оваа појава.

Продолживме да ја поддржуваме и културата како двигател на поврзување и солидарност. Со поддршка на летната сцена „Славиша Кајевски“ во Македонскиот народен театар, под слоганот „Млади за млади“, овозможивме промоција на млади македонски музички изведувачи, додека средствата од продажбата на билетите беа наменети за поддршка на повредените во трагедијата во Кочани. Преку ваквите партнерства, придонесуваме за развој на домашната култура, младите таленти и општествената солидарност.

Поддршката на спортот и младите останува важен дел од нашата општествена улога. Како долгогодишен партнер на Македонската ракометна репрезентација, продолживме да вложуваме во развојот на ракометот и младинските спортски иницијативи, промовирајќи тимски дух, заедништво и позитивни општествени вредности. Во 2025 година го поддржавме и Европскиот младински олимписки фестивал (ЕМОФ), обезбедувајќи интернет конективност и дигитална поддршка на повеќе од 30 локации, со што овозможивме учесниците од цела Европа да останат поврзани меѓусебно и со своите семејства.

Продолживме да поддржуваме и иницијативи што промовираат еднаквост, инклузија и рушење на предрасудите. На „Ability Awards 2025“, Македонски Телеком ја доби наградата за Инклузивна маркетинг кампања на годината за кампањата „Никој не се раѓа со предрасуди“, како признание за нашата посветеност кон создавање комуникации и иницијативи што придонесуваат за поголема општествена инклузија и еднаков пристап за сите.

Волонтерството и општествената ангажираност остануваат важен дел од корпоративната култура на компанијата. Во 2025 година, ја промовиравме волонтерската програма за вработените „Волонтирам, Волонтирај!“, во чии рамки нашите вработени учествуваа во бројни активности за поддршка на ранливи групи, дигитална инклузија и заштита на животната средина. Компанијата обезбеди и хуманитарна поддршка по трагичниот пожар во Кочани, како и поддршка за организации што работат со жртви на насилство и ранливи категории граѓани.

Продолжуваме да инвестираме во дигитални технологии, иновации и партнерства што придонесуваат за поинклузивно, безбедно и одржливо општество, со јасна цел – технологијата да биде двигател на позитивни промени и подобар живот за сите.