Објавени финансиските резултати од работењето за третиот квартал од 2011 година
Зголемен број на DSL корисници за 8,5% што резултира со 157 илјади корисници на крајот од септември 2011 година
Бројот на IPTV корисници изнесува 35 илјади, што претставува пораст за 51,0% во споредба со истиот период лани

Македонски Телеком АД-Скопје и T-Mobile Македонија ги објавија финансиските резултати од работењето за третиот квартал од 2011 година. Според консолидираните финансиски извештаи, Македонски Телеком АД-Скопје и T-Mobile Македонија, наспроти силното пазарното опкружување, одржуваат водечка позиција во сегментот на фиксната и мобилната телефонија. Сепак, во третиот квартал од годината, пред се како резултат на големата конкуренција на пазарот на мобилна телефонија, приходите од продажба на ниво на Групација се намалени за 10,2% во споредба со истиот период во 2010 година.

Македонски Телеком успеа да ја одржи својата водечка позиција со 77% удел на пазарот во сегментот на фиксна телефонија и со 57% удел на пазарот на широкопојасен интернет, согласно интерните податоци. Но, приходите на Македонски Телеком од говорни услуги се намалени како резултат на опаѓање на бројот на корисници за 8,5%, што резултираше во корисничка база од 318 илјади корисници на крајот од септември 2011 година и поради намалувањето на појдовниот сообраќај за 6,7% во третиот квартал во 2011 година, во споредба со истиот период во минатата година.

Како резултат на фокусот на Македонски Телеком на double и triple play пакетите, вкупниот број на DSL корисници на крајот на септември 2011 година достигна 157 илјади корисници, што претставува пораст за 8,5% во споредба со истиот период лани.

Со својата уникатна IPTV услуга, Македонски Телеком, влезе како предизвикувач на пазарот, на кој доминираа операторите на кабелски телевизии. Сепак, како резултат на високо квалитетната услуга, интерактивноста и единственото ТВ искуство со можноста за снимање, паузирање и премотување на програмата, Македонски Телеком го зголеми бројот на IPTV корисници за 51,0% во споредба со крајот на септември 2010 година, при што бројот на корисници изнесуваше 35 илјади на крајот на септември 2011 година.

Интензивната конкуренција во мобилната телефонија, особено во сегментот на припејд и деловни корисници, влијае на намалување на приходите од мобилна телефонија во третиот квартал од 2011 година, во споредба со истиот квартал во 2010 година. Опаѓањето на приходите од мобилна телефонија најмногу се должи на намалувањето на приходите од говорни малопродажни услуги, главно како резултат на благото намалување на базата на претплатници чијшто број на крајот од септември 2011 година изнесуваше 1,3 милиони корисници.

На страната на трошоците, во текот на третиот квартал од 2011 година, оперативните расходи се намалија за 4,5% во споредба со истиот период во 2010 година. Сите овие движења на страната на приходите и трошоците, ја намалија нето добивката за третиот квартал од 2011 година за 18,2% во споредба со истиот период изминатата година, што резултираше во нето добивка од 1.542.768 илјади денари.

„Иако конкуренцијата и условите на пазарот влијаеја на остварените резултати во третиот квартал на 2011 година, сепак T-Mobile Македонија ја задржа својата водечка позиција со пазарен удел од 50,3% според интерните резултати. Остануваме лидери на пазарот и во наредниот период, ќе се фокусираме на воведување на иновативни услуги, базирани на интернет и најнови паметни телефони. Истовремено, нашите активности се насочени кон модернизација на мрежата и надградба на базните станици, со цел да се овозможи поголем и побрз проток на сообраќај, следејќи ги при тоа можностите и потребите на корисниците на македонскиот пазар, со цел да им го овозможиме најдоброто за нивните пари“, изјави главниот извршен директор на T-Mobile, г-дин Жарко Луковски.

„Задоволен сум од постигнатите резултати на Македонски Телеком и на T-Mobile Групацијата, како во фиксниот, така и во мобилниот сегмент. И покрај целокупната макроекономска ситуација во државата и притисокот кој доаѓа од конкуренцијата, успеавме да ја одржиме нашата стабилност и лидерска позиција на пазарот, особено во сегментот на широпојасниот интернет и IPTV услугата, при што забележавме пораст на бројот на IPTV корисници за 51 % во споредба со истиот квартал од 2010 година. Како компанија секојдневно ги збогатуваме содржините и ги унапредуваме карактеристиките на MaxTV услугата, согласно потребите и барањата на нашите корисници, така што се надеваме дека трендот на зголемување на бројот на IPTV корисници ќе продолжи до крајот на годината. Во наредниот период ќе работиме со засилено темпо, со цел да ги оствариме проекциите за 2011 година. При тоа, нашите активности примарно ќе бидат насочени кон продолжување на започнатите инвестиции во мрежата, понуда на нови супериорни и иновативни технолошки решенија и услуги, докажувајќи на тој начин дека сме провајдери со највисоки стандарди за квалитет, дека сме провајдери кои што овозможуваат уникатни решенија со кои што им го олеснуваме и збогатуваме секојдневието на нашите корисници“, изјави г-дин Даниел Сас, главен извршен директор на Македонски Телеком и претседател на Одборот на директори на T-Mobile Македонија.

Информации

{{Title}}